দ্য আউটপোষ্ট, গুৱাহাটী, ৬ জানুৱাৰীঃ
চুবুৰীয়া দেশ বাংলাদেশত শেহতীয়াকৈ হিন্দু ধৰ্মাৱলম্বী লোকসকলৰ ওপৰত বৃদ্ধি পোৱা আক্ৰমণৰ ঘটনাক লৈ মঙলবাৰে গভীৰ উদ্বেগ প্ৰকাশ কৰিছে অসমৰ মুখ্যমন্ত্ৰী ড° হিমন্ত বিশ্ব শৰ্মাই। বাংলাদেশৰ বৰ্তমানৰ অস্থিৰ পৰিস্থিতি আৰু যোৱা ১০ বছৰ ধৰি অসমত বৃদ্ধি পোৱা জেহাদী কাৰ্যকলাপৰ প্ৰমাণে ৰাজ্যখনৰ নিৰাপত্তাৰ প্ৰতি এক বৃহৎ প্ৰত্যাহ্বান কঢ়িয়াই আনিছে বুলি তেওঁ মন্তব্য কৰে।
মঙলবাৰে সাংবাদিকৰ সৈতে হোৱা এক বাৰ্তালাপত মুখ্যমন্ত্ৰী গৰাকীয়ে কয়, "বাংলাদেশত যি ঘটিছে সেয়া আমাৰ বাবে অত্যন্ত উদ্বেগৰ বিষয়। যিহেতু বাংলাদেশত হিন্দুসকলৰ ওপৰত হোৱা আক্ৰমণৰ প্ৰভাৱ অসমতো পৰাৰ সম্ভাৱনা আছে, গতিকে আমি অধিক সতৰ্ক হোৱাৰ লগতে পৰিস্থিতি নিৰন্তৰ নিৰীক্ষণ কৰিব লাগিব।"
মুখ্যমন্ত্ৰীগৰাকীয়ে লগতে উল্লেখ কৰে যে চুবুৰীয়া দেশখনৰ শোচনীয় পৰিস্থিতি আৰু ৰাজ্যৰ অভ্যন্তৰত সক্ৰিয় হৈ থকা জেহাদী শক্তিসমূহে নিৰাপত্তাৰ ক্ষেত্ৰত এক জটিল ভাবুকি সৃষ্টি কৰিছে। তেওঁৰ মতে, চুবুৰীয়া দেশসমূহৰ ভূ-ৰাজনৈতিক পৰিস্থিতিৰ আশানুৰূপ উন্নতি নোহোৱালৈকে এই নিৰাপত্তাৰ শংকা বিদ্যমান থাকিব। অসম চৰকাৰে এই সমগ্ৰ পৰিস্থিতিৰ ওপৰত চোকা নজৰ ৰাখিছে বুলিও তেওঁ সংবাদ মাধ্যমক জানিবলৈ দিয়ে।
